தீபாவளி படங்கள்

இந்த வருட தீபாவளி தமிழ்சினிமாவுக்கு ஏற்றம் இல்லை.காரணம், தீபாவளிக்கு ரஜினி படம் இல்லை.எதிர்பார்த்த கமலின் 'தசாவதாரமும்' இல்லை.விக்ரமின் 'பீமா' வெளியாகும் என்று பார்த்தால் அதுவும் இல்லை.சிம்புவின் 'காளை', மாதவனின் 'எவனோ ஒருவன்', ஆர்யாவின் 'ஓரம்போ' ஆகியவையும இல்லை. இந்த தீபாவளி தமிழ் சினிமாவுக்கு இறக்கமும் இல்லை.காரணம் விஜய்யின் 'அழகிய தமிழ்மகன்', சூர்யாவின் 'வேல்' மற்றும் தனுஷின் 'பொல்லாதவன்.'தீபாவளிக்கு வெளியாகும் பெரிய படங்கள் இவை.இவைதவிர தமிழ்வாணனின் 'மச்சக்காரன்' ப்ரியாவின் 'கண்ணாமூச்சி ஏனடா''ஆக்ரா' படங்கள் லிஸ்டில் சேர்ந்து கொள்கின்றன.வெளியாகும் ஆறில் நான்கு பழுதில்லை என்றாலே, தீபாவளி அமர்க்களம்தான், தமிழ் சினிமாவுக்கு!

அழகிய தமிழ்மகன்
அப்பச்சன் தயாரித்துள்ளார். இயக்கியிருப்பது தரணியின் உதவியாளர் பரதன்.கதைப்படி விஜய்க்கு ஒரு வேடம்.படத்தில் இரண்டு வேடம்போல் தோன்றும் வித்தியாசமான திரைக்கதை.எதிர்காலத்தை முன்கூட்டியே தெரிந்து கொள்ளும் இளைஞனாக வருகிறாராம் விஜய்.ஸ்ரேயா, நமிதா என இரண்டு ஜோடிகள்.ஏ.ஆர். ரஹ்மான் இசையில் பாடல்கள் ஏற்கனவே டீ கடைகளையும், தனியார் எப்.எம். களையும் ஆக்ரமித்து விட்டன.

வேல்
அண்ணன், தம்பி என சூர்யா இரண்டு வேடத்தில் நடிக்கும் படம்.அரிவாளை விட அறிவு பெரிது என்பது கதை.ஜோடி அசின். கிராமம் நகரம் என இருவித தோற்றத்தில் சூர்யா.அரிவாள் இல்லாமல் என்னால் படம் பண்ண முடியாது என்று சொல்லும் ஹரி, இயக்குனர்.வடிவேலின் காமெடி, யுவனின் இசை என களை கட்டுகிறது 'வேல்.'

பொல்லாதவன்
அப்பாவின் கனவை நிறைவேற்ற மூன்று மணிநேரம்-மட்டும் பொல்லாதவனாக மாறும் இளைஞனின் கதை.தனுஷுக்கு ஜோடி திவ்யா. வெற்றிமாறன் இயக்கும் முதல் படம்.ஜீ.வி. பிரகாஷின் இசையில் பாடல்கள் தாளம் போட வைக்கின்றன.'எங்கேயும் எப்போதும்....' ரீ-மிக்ஸும் உண்டு.

மச்சக்காரன்
எதுவுமே இல்லாத ஒருவன், எல்லாமே உள்ள ஒருத்தி. இவர்கள் சந்தித்தால்?அதுதான் 'மச்சக்காரன்' கதை என்கிறார் இயக்குனர் தமிழ்வாணன்.எதுவுமே இல்லாதவனாக ஜீவன். எல்லாமே இருப்பவராக காம்னா.யுவன் ஷங்கர்ராஜா இசை.ஜீவனின் ப்ளேபாய் இமேஜை மாற்றப்போகும் படம் என்கிறார் தமிழ்வாணன்.

கண்ணாமூச்சி ஏனடா
இளைஞர்களுக்கு ஏற்படும் காதல் பிரச்சனைகள்,நடுத்தர வயதினருக்கு வந்தால் என்ன ஆகும்என்பதை கலகலப்பாக சொல்லியிருக்கிறார் இயக்குனர் ப்ரியா வி.சத்யராஜ், ராதிகா ஒரு ஜோடி, ப்ருதிவிராஜ், சந்தியா இளம் ஜோடி.யுவன் ஷங்கர்ராஜா இசை.நகைச்சுவைக்காகவே ஓடும் பல வாரம் என்கிறார்கள்.

ஆக்ரா
தாஜ்மஹாலில் பொம்மை விற்கும் பெண்ணின் காதல் கதை.இயக்குனர் சித்திரை செல்வன்.முழுக்க புதுமுகங்கள் நடிக்கும் படம்.பாடல்கள் எழுதியிருக்கும் வைரமுத்து தவிர மற்றவர்கள் புதுசு கண்ணா புதுசு.